KL University: దేశంలోనే తొలి 'ఏజెంటిక్ ఏఐ క్యాంపస్'గా కేఎల్ యూనివర్సిటీ!

KL University: ఏఐ సమీకృత ఉన్నత విద్యలో ఒక ముఖ్యమైన ముందడుగుగా, కేఎల్ డీమ్డ్ టు బీ యూనివర్సిటీ, హెచ్‌సీఎల్ గ్రూప్‌ నకు చెందిన హెచ్ సిఎల్ జియు విఐ ఎఐ లాబ్స్ (HCL GUVI AI Labs) తో చేతులు కలిపి, HCL GUVI AI Labs సహకారంతో, ఏఐ ఆధారిత డిగ్రీలతో దేశంలోనే తొలి ఏజెంటిక్ ఏఐ క్యాంపస్‌”ను ఏర్పాటు చేస్తోంది.

ఈ భాగస్వామ్యానికి సంబంధించి యూనివర్సిటీ లో సోమవారం ఏర్పాటు చేసిన కార్యక్రమంలో అవగాహన ఒప్పందం (MoU)పై హెచ్ సిఎల్ ప్రతి నిధులు ఏవీపీ, ఏఐ ల్యాబ్ జాతీయ అధిపతి దీపక్ శరవణన్, కెఎల్ యూనివర్శిటీ రిజిస్ట్రార్ డాక్టర్ కె.పవన్ కుమార్ లు సంతకాలు చేశారు.

ఈ కార్యక్రమానికి హెచ్‌సీఎల్ గ్రూప్ ప్రతినిధులైన ఏ ఐ ల్యాబ్ జాతీయ అధిపతి దీపక్ శరవణన్, ప్రాంతీయ అధిపతి సందీప్, ఆపరేషన్స్ హెడ్ సుమిత హాజరయ్యారు. వీరితో పాటు కేఎల్ యూనివర్సిటీ ఉపకులపతి డాక్టర్ జి. పార్థసారథి వర్మ, విశ్వవిద్యాలయ సీనియర్ అధికారులు, విశిష్ట అతిథులు పాల్గొన్నారు. ఈ సందర్బంగా అవగాహన ఒప్పందంపై సంతకాలు, ఏజెంటిక్ ఏఐ క్యాంపస్ కార్యక్రమానికి అధికారిక ప్రారంభం, విద్యార్థులతో ముఖాముఖి, విద్యా–పరిశ్రమ రంగాల మధ్య చర్చలు జరిగాయి.

సంప్రదాయ విద్యా–పరిశ్రమ ఒప్పందానికి మించి, ఈ భాగస్వామ్యం విద్యార్థి కేంద్రిత పరివర్తన కార్యక్రమాన్ని అందుబాటులోకి తీసుకొస్తోంది. వివిధ విభాగాలకు చెందిన విద్యార్థులు తదుపరి తరం కృత్రిమ మేధ (ఏఐ), ఏజెంటిక్ ఏఐ వ్యవస్థలను అర్థం చేసుకోవడానికి, అభివృద్ధి చేయడానికి, వాస్తవ వినియోగంలో అమలు చేయడానికి అవసరమైన జ్ఞానం, ఆచరణాత్మక నైపుణ్యాలను పెంపొందించుకోవడం దీని లక్ష్యం.

డిగ్రీ కార్యక్రమాలు, పాఠ్యప్రణాళికలు, ప్రయోగశాలలు, ప్రాజెక్టులు, అభ్యసన కార్యకలాపాల్లో ఏఐని దశలవారీగా సమీకరించనున్నారు. విద్యార్థులు కృత్రిమ మేధ, మెషిన్ లెర్నింగ్, జనరేటివ్ ఏఐ, లార్జ్ లాంగ్వేజ్ మోడల్స్‌తో పాటు ఇతర అభివృద్ధి చెందుతున్న సాంకేతిక పరిజ్ఞానాలపై అవగాహన పొందుతారు. తద్వారా తమ తమ విద్యా విభాగాల్లో ఏఐని అన్వయించగలుగుతారు.

విద్యార్థులను ఏఐ సాధనాలను వినియోగించేవారిగా మాత్రమే కాకుండా, స్వయంప్రతిపత్తి గల, పాక్షిక స్వయంప్రతిపత్తి గల ఏఐ ఏజెంట్ల సృష్టికర్తలుగా తీర్చిదిద్దడంపై ప్రధానంగా దృష్టి సారించనున్నారు. లక్ష్యాలను అర్థం చేసుకోవడం, క్లిష్టమైన పనులపై తార్కికంగా ఆలోచించడం, బహుళ దశల చర్యలను ప్రణాళికాబద్ధంగా రూపొందించడం, సంస్థాగత జ్ఞానాన్ని పొందడం, డేటాబేస్‌లు, అప్లికేషన్లతో పరస్పర చర్యలు జరపడం, బాహ్య సాధనాలు, ఏపీఐలను ఉపయోగించడం, సందర్భానికి అనుగుణమైన కార్యప్రవాహాలను అమలు చేయగల తెలివైన వ్యవస్థలను నిర్మించడం విద్యార్థులు నేర్చుకుంటారు.

ఈ భాగస్వామ్యంపై కేఎల్ యూనివర్సిటీ చాన్సలర్ కోనేరు సత్యనారాయణ మాట్లాడుతూ, “పరిశ్రమలు పనిచేసే విధానాన్ని, ఆవిష్కరణలను చేపట్టే తీరును, విలువను సృష్టించే ప్రక్రియను కృత్రిమ మేధ సమూలంగా మారుస్తోంది.

అందువల్ల విశ్వవిద్యాలయాలు ఏఐని ఒక ప్రత్యేక సబ్జెక్టుగా బోధించడానికే పరిమితం కాకుండా, మొత్తం అభ్యసన వ్యవస్థలో భాగం చేయాలి. HCL GUVI AI Labsతో మా భాగస్వామ్యం ద్వారా వివిధ విభాగాల విద్యార్థులు ఏఐ సాధనాలను ఉపయోగించే స్థాయి నుంచి తెలివైన ఏజెంట్లను రూపొందించడం, వాస్తవ వినియోగానికి సిద్ధమైన పరిష్కారాలను అభివృద్ధి చేయడం, వాస్తవ ప్రపంచ సవాళ్లకు ఉపయోగపడే ఉత్పత్తులను నిర్మించే స్థాయికి ఎదిగేలా చేయడమే మా లక్ష్యం” అని తెలిపారు.సాంకేతిక నైపుణ్యం, సృజనాత్మకత, వ్యవస్థాపక ఆలోచనలతో పాటు నైతిక, బాధ్యతాయుత ఏఐ పట్ల దృఢమైన నిబద్ధత కలిగిన, పరిశ్రమ అవసరాలకు సిద్ధంగా ఉండే నిపుణులను తీర్చిదిద్దడమే మా దార్శనికత” అని ఆయన మరింత వివరించారు.

ఈ కార్యక్రమంలో యూనివర్శిటీ వైస్ ఛాన్సలర్ డాక్టర్ జి.పార్ధసారధివర్మ, ప్రోవైస్ ఛాన్సలర్లు డాక్టర్ ఎన్.వెంకట్రామ్, డాక్టర్ కె.రాజశేఖరరావు, రిజిస్ట్రార్ డాక్టర్ కె.పవన్ కుమార్, స్కిల్ డెవలెప్ మెంట్ డీన్ డాక్టర్ ఎ.శ్రీనాధ్, అడ్మిషన్ల డైరెక్టర్ డాక్టర్ జె.శ్రీనివాసరావు, స్టూడెంట్ అఫైర్స్ డీన్ డాక్టర్ కెఆర్ఎస్.ప్రసాద్, హెచ్‌సీఎల్ గ్రూప్ ప్రతినిధులైన ఏ ఐ ల్యాబ్ జాతీయ అధిపతి దీపక్ శరవణన్, ప్రాంతీయ అధిపతి సందీప్, ఆపరేషన్స్ హెడ్ సుమిత తదితరులు పాల్గొన్నారు.