Nara Lokesh: అర్థం అయిందా రాజా!: భోగాపురం సభలో నారా లోకేశ్‌ సంచలన కామెంట్స్!

Nara Lokesh: "ఉత్తరాంధ్రను గతంలో చాలా తక్కువ చేసి చూశారు.. ఎంతో అవమానించారు. ఎర్ర బస్సు కూడా రాదన్న చోట ఇవాళ ఏకంగా ఎయిర్‌ బస్సు వచ్చింది.. 'అర్థం అయిందా రాజా!'" అంటూ రాష్ట్ర ఐటీ, విద్యా శాఖ మంత్రి నారా లోకేశ్ ప్రత్యర్థులపై విమర్శల బాణాలు విసిరారు. భోగాపురం అల్లూరి సీతారామరాజు అంతర్జాతీయ విమానాశ్రయాన్ని ప్రధాని నరేంద్ర మోదీ జాతికి అంకితం చేసిన అనంతరం జరిగిన భారీ బహిరంగ సభలో లోకేశ్ ప్రసంగించారు. ఉత్తరాంధ్ర పౌరుషం ఏంటో ఇప్పుడు ప్రపంచానికి తెలుస్తోందని భావోద్వేగంగా వ్యాఖ్యానించారు.

"ఈ నేలకు స్వాతంత్ర్యం తెచ్చింది విప్లవ వీరుడు అల్లూరి సీతారామరాజు అయితే.. ఉత్తరాంధ్ర అభివృద్ధికి రెక్కలు ఇచ్చింది మన ప్రధాని నరేంద్ర మోదీ గారు. రాష్ట్ర విభజన వల్ల ఏపీ చాలా నష్టపోయింది. కానీ, చంద్రబాబు నాయుడు జీ మరియు మోదీ జీ ఇద్దరూ కలిసి మనకు 'నమో'గా మారారు. ఈ కాంబినేషన్‌తోనే రాష్ట్రంలో అమరావతి, పోలవరం మరియు ఇతర ప్రతిష్టాత్మక ప్రాజెక్టులు వేగంగా పూర్తవుతున్నాయి." అని నారా లోకేశ్ అన్నారు.

ఉత్తరాంధ్ర అన్ని రకాల వనరులు ఉన్న ప్రాంతమని, ఇది భారతదేశానికే కంచుకోటలా నిలుస్తుందని లోకేశ్ కొనియాడారు. త్వరలోనే ఇక్కడ భారీ డేటా సెంటర్లు, ఉక్కు పరిశ్రమలు ఏర్పాటు కాబోతున్నాయని, ఎయిర్‌పోర్ట్ రాకతో ఎగుమతులు పెరిగి వేలాది మంది యువతకు స్థానికంగానే ఉపాధి లభిస్తుందన్నారు. అప్పట్లో అశోక్ గజపతి రాజు వేసిన విత్తనమే నేడు భోగాపురం ఎయిర్‌పోర్ట్ రూపంలో సాకారమైందని గుర్తుచేశారు.

రికార్డు సమయంలో విమానాశ్రయాన్ని పూర్తి చేసినందుకు రాజాం ప్రాంతానికి చెందిన జీఎంఆర్ (GMR) అధినేతను, కేంద్ర మంత్రి రామ్మోహన్ నాయుడిని అభినందించారు. రాబోయే 2029 సార్వత్రిక ఎన్నికల్లో కూడా నరేంద్ర మోదీ నేతృత్వంలోని ఎన్డీయే (NAMO) మళ్లీ అధికారంలోకి వచ్చేలా ఏపీ నుంచి పూర్తి సహకారం అందిస్తామని స్పష్టం చేశారు.