Madhurawada: మధురవాడలో ప్రజలతో వైజాగ్ సిటీ పోలీసుల ముఖాముఖి

మధురవాడ: విశాఖపట్నం నగర పోలీసుల ఆధ్వర్యంలో మధురవాడ పరిధిలోని 6వ వార్డు నుంచి 11వ వార్డు వరకు నివసిస్తున్న ప్రజలు, రాజకీయ నాయకులు, ప్రజాప్రతినిధులతో ముఖాముఖి కార్యక్రమాన్ని నిర్వహించారు. ఈ కార్యక్రమంలో డీసీపీ (లా అండ్ ఆర్డర్), జోన్-1, నార్త్ ఏసీపీ, పి.ఎం.పాలెం పోలీస్ స్టేషన్ ఇన్‌స్పెక్టర్‌తో పాటు సంబంధిత పోలీసు సిబ్బంది పాల్గొన్నారు.

ఈ సందర్భంగా ఎన్నికల సమయంలో పాటించాల్సిన నియమ నిబంధనలు, ఎన్నికల ప్రచారానికి సంబంధించిన మార్గదర్శకాలు, పోలింగ్‌కు ముందు 48 గంటల సమయంలో అనుసరించాల్సిన నిబంధనలు, పోలింగ్‌ రోజున పాటించాల్సిన నియమాలపై పోలీసులు ప్రజలకు, రాజకీయ నాయకులకు, ఓటర్లకు అవగాహన కల్పించారు.

ఎవరైనా ఓటర్లను బెదిరించినా, ప్రలోభాలకు గురిచేసినా లేదా ఎన్నికల ప్రక్రియకు ఆటంకం కలిగించినా వెంటనే పోలీసులకు సమాచారం అందించాలని సూచించారు. ప్రతి ఒక్కరూ తమ ఓటు హక్కును స్వేచ్ఛగా, స్వచ్ఛందంగా వినియోగించుకోవాలని కోరారు.

ప్రజలకు ఎలాంటి ఇబ్బందులు ఎదురైనా 7995095799 నంబర్‌కు ఫోన్ చేయాలని లేదా సమీపంలోని పోలీస్ స్టేషన్‌ను సంప్రదించాలని తెలిపారు.

స్వేచ్ఛాయుత, నిష్పక్షపాత, ప్రశాంతమైన ఎన్నికల నిర్వహణే విశాఖపట్నం నగర పోలీసుల ప్రధాన లక్ష్యమని పేర్కొన్నారు. ఎన్నికల సమయంలో ఎలాంటి అవాంఛనీయ సంఘటనలు చోటుచేసుకోకుండా ప్రజల సహకారంతో ఎన్నికల ప్రక్రియను సజావుగా నిర్వహించేందుకు పోలీసులు కట్టుబడి ఉన్నారని తెలిపారు.