Paderu: పాడేరులో రైతులకు సుగంధ ద్రవ్యాల సాగుపై ప్రత్యేక అవగాహన!

Paderu: అల్లూరి సీతారామరాజు జిల్లా పాడేరులో రైతులకు సుగంధ ద్రవ్యాల సాగు, పంటల నాణ్యత ప్రమాణాలు, పంటకోత అనంతర యాజమాన్య పద్ధతులు, విలువ ఆధారిత ఉత్పత్తుల తయారీపై అవగాహన కల్పించే కార్యక్రమాన్ని నిర్వహించారు.

సుగంధ ద్రవ్యాల సాగు ద్వారా రైతుల ఆదాయాన్ని పెంపొందించడం, నాణ్యమైన వ్యవసాయ ఉత్పత్తుల ద్వారా మెరుగైన మార్కెట్ అవకాశాలను అందిపుచ్చుకోవడమే ఈ కార్యక్రమం ముఖ్య ఉద్దేశమని అధికారులు తెలిపారు.

ఈ కార్యక్రమంలో భాగంగా మంచి వ్యవసాయ పద్ధతులు (Good Agricultural Practices), మంచి పరిశుభ్రత పద్ధతులు (Good Hygiene Practices – GHP), మంచి నిల్వ పద్ధతులు (Good Storage Practices) పాటించాల్సిన ఆవశ్యకతను వివరించారు. పంటల నాణ్యతను కాపాడుకోవడం, ఉత్పత్తుల నిల్వలో తగిన జాగ్రత్తలు తీసుకోవడం, పంటకోత అనంతర నిర్వహణ ద్వారా నష్టాలను తగ్గించుకోవడంపై రైతులకు అవగాహన కల్పించారు.

సుగంధ ద్రవ్యాల సాగుతో పాటు పంటకోత అనంతర నిర్వహణ, విలువ ఆధారిత ఉత్పత్తుల తయారీ, ప్రాసెసింగ్, మార్కెటింగ్ వంటి అంశాలపై నిపుణులు వివరించారు. రైతులు పండించిన ఉత్పత్తులకు మెరుగైన ధరలు లభించేలా నాణ్యత ప్రమాణాలను పాటించాలని సూచించారు.

జిల్లా ఉద్యానశాఖ అధికారి ఎం. శ్రీధర్, జిల్లా వ్యవసాయ అధికారి ఎస్.బి.ఎస్. నందు, కృషి విజ్ఞాన కేంద్రం (KVK), కందంపూడికి చెందిన డాక్టర్ ఎన్. రాజ్‌కుమార్, శాస్త్రవేత్త డాక్టర్ ఎన్. సాహితి బాబు, వ్యవసాయ ఇంజినీర్ ఈ. పి. బాబు తదితరులు రైతులకు వివిధ అంశాలపై అవగాహన కల్పించారు.

జిల్లా ఉద్యానశాఖ అధికారి ఎం. శ్రీధర్ మాట్లాడుతూ, రైతులు రైజ్డ్ బెడ్ విధానంలో సాగు చేయడం, పంటల నిర్వహణలో ఆధునిక పద్ధతులను అనుసరించడం ద్వారా మెరుగైన దిగుబడులు సాధించవచ్చని వివరించారు. జిల్లా వ్యవసాయ అధికారి ఎస్.బి.ఎస్. నందు రైతులకు వ్యవసాయ శాఖ ద్వారా అందించే సేవలు, రైతు సేవా కేంద్రాలు, సాంకేతిక సలహాల వినియోగంపై వివరించారు.

కాఫీ బోర్డు డిప్యూటీ డైరెక్టర్ ఎస్. మురళీధర మాట్లాడుతూ, గిరిజన రైతులు కాఫీతో పాటు ఇతర అంతర పంటల సాగును ప్రోత్సహించుకోవడం ద్వారా ఆదాయాన్ని పెంచుకోవచ్చని వివరించారు. మసాలా దినుసుల సాగు, నాణ్యమైన ఉత్పత్తుల తయారీ, మార్కెటింగ్ అవకాశాలను సద్వినియోగం చేసుకోవాలని సూచించారు.

MTAG Industries Pvt. Ltd.కు చెందిన ప్రతినిధులు కూడా సుగంధ ద్రవ్యాల సాగు, ప్రాసెసింగ్, మార్కెటింగ్, ఎగుమతులకు అవసరమైన నాణ్యత ప్రమాణాలపై వివరించారు.

ఈ కార్యక్రమంలో స్పైసెస్ బోర్డు సీనియర్ ఫీల్డ్ ఆఫీసర్ బి. కళ్యాణి, వ్యవసాయ, ఉద్యానశాఖ అధికారులు, కృషి విజ్ఞాన కేంద్రం శాస్త్రవేత్తలు, పాడేరు, హుకుంపేట, జి. మాడుగుల మండలాలకు చెందిన రైతులు, రైతు ఉత్పత్తిదారుల సంస్థల (FPOs) ప్రతినిధులు పాల్గొన్నారు.