Anakapalli: అనకాపల్లిలో ఎన్నికల సామగ్రి పంపిణీ ముమ్మరం

అనకాపల్లి: స్థానిక సంస్థల ఎన్నికల ప్రక్రియ తుది అంకానికి చేరుకుంది. పోలింగ్ నిర్వహణకు సంబంధించి అధికార యంత్రాంగం ఏర్పాట్లను వేగవంతం చేసింది. పోలింగ్ కేంద్రాల్లో ఎలాంటి ఇబ్బందులు తలెత్తకుండా ఎన్నికల సామగ్రి పంపిణీ ప్రక్రియను పకడ్బందీగా చేపట్టింది.

అనకాపల్లిలోని రావు గోపాలరావు కళాక్షేత్రం డిస్ట్రిబ్యూషన్ సెంటర్‌ నుంచి వివిధ పోలింగ్ కేంద్రాలకు ఎన్నికల సామగ్రి తరలింపు కార్యక్రమం ముమ్మరంగా కొనసాగుతోంది. మొత్తం 89 పోలింగ్ బూతులకు అవసరమైన ఎన్నికల సామగ్రిని అధికారులు పంపిణీ చేస్తున్నారు. ఇందులో భాగంగా ప్రతి పోలింగ్ బూత్‌కు రెండు బ్యాలెట్ బాక్సుల చొప్పున కేటాయించి, ఎన్నికల సిబ్బందికి అందజేస్తున్నారు.

మరోవైపు ఎన్నికల నిర్వహణలో ఎలాంటి అవాంఛనీయ సంఘటనలకు తావులేకుండా పోలీసు యంత్రాంగం అప్రమత్తమైంది. డిస్ట్రిబ్యూషన్ సెంటర్ వద్ద భారీ పోలీసు బందోబస్తు ఏర్పాటు చేయడంతో పాటు, ఎన్నికల సామగ్రి పంపిణీ ప్రక్రియను అధికారులు నిరంతరం పర్యవేక్షిస్తున్నారు.

మొత్తానికి ప్రశాంత వాతావరణంలో పోలింగ్ ప్రక్రియను పూర్తి చేసేందుకు అటు ఎన్నికల అధికారులు, ఇటు పోలీసు యంత్రాంగం సమన్వయంతో ముందుకు సాగుతోంది.