Visakhapatnam: స్పా సెంటర్లపై పోలీసుల ఆకస్మిక తనిఖీలు, దాడులు

విశాఖపట్నం: 31 విశాఖ నగరంలో స్పా / మసాజ్ సెంటర్లు నిబంధనలను పాటిస్తున్నాయా లేదా తెలుసుకోవడానికి, అలాగే ఎలాంటి అక్రమ కార్యకలాపాలు జరగకుండా చూడడానికి విశాఖపట్నం సిటీ పోలీసులు 30.08.2026న నగరంలోని స్పా / మసాజ్ సెంటర్లపై ప్రత్యేక తనిఖీలు మరియు దాడులు నిర్వహించారు.

ఈ తనిఖీల్లో స్పా / మసాజ్ సెంటర్లకు అవసరమైన లైసెన్సులు, అనుమతులు, ఫైర్ సేఫ్టీ, ఆరోగ్యం మరియు పరిశుభ్రత, సిబ్బంది వివరాలు, రికార్డులు మరియు ఇతర అవసరమైన పత్రాలను పరిశీలించారు.

ఈ ప్రత్యేక తనిఖీల కోసం 54 పోలీసు బృందాలను ఏర్పాటు చేశారు. ఈ బృందాలు నగరంలోని వివిధ పోలీస్ స్టేషన్ల పరిధిలో ఉన్న స్పా / మసాజ్ సెంటర్లపై ఒకేసారి తనిఖీలు నిర్వహించాయి.

తనిఖీల వివరాలు :

నగరంలో మొత్తం 121 స్పా / మసాజ్ సెంటర్లను తనిఖీల కోసం గుర్తించారు. తనిఖీల సమయంలో కొన్ని స్పా / మసాజ్ సెంటర్లలో లైసెన్సులు మరియు అనుమతులు, ఫైర్ సేఫ్టీ, ఆరోగ్యం మరియు పరిశుభ్రత, అవసరమైన పత్రాలు, శిక్షణ పొందిన సిబ్బంది, రికార్డుల నిర్వహణ తదితర అంశాల్లో లోపాలు గుర్తించారు.

నిబంధనలు పాటించని స్పా / మసాజ్ సెంటర్లపై సంబంధిత శాఖలతో కలిసి చట్టప్రకారం చర్యలు తీసుకోనున్నారు. మియామి ఆయుర్వేదిక్ థాయ్ స్పాలో అనుమానాస్పద కార్యకలాపాలు.

ఈ తనిఖీలలో గాజువాక, చిన్న గంట్యాడలోని మియామి ఆయుర్వేదిక్ థాయ్ స్పాలో అనుమానాస్పద కార్యకలాపాలు గుర్తించారు. అక్కడ వ్యభిచారానికి సంబంధించిన కార్యకలాపాలు జరుగుతున్నట్లు గుర్తించారు.

ఆ స్పాలో తనిఖీ సమయంలో 04 మంది బాధితులు మరియు 03 మంది పురుషులు ఉన్నట్లు గుర్తించారు. వారిని అదుపులోకి తీసుకుని తదుపరి చట్టపరమైన చర్యల కోసం గాజువాక పోలీస్ స్టేషన్‌కు అప్పగించారు. ఈ ఘటనపై గాజువాక పోలీస్ స్టేషన్‌లో క్రైమ్ .నెంబర్ .329/2026గా బి ఎన్ ఎస్ సెక్షన్లు 143(2), 144(2) ఆర్ / డబ్ల్యు 3(5) మరియు ఐటీపీ యాక్ట్ సెక్షన్లు 3(1), 4(1), 5(1)(ఏ ) కింద కేసు నమోదు చేశారు. ఈ కేసులో దర్యాప్తు కొనసాగుతోంది.

స్పా / మసాజ్ సెంటర్ల నిర్వాహకులకు పోలీసుల సూచనలు:

స్పా / మసాజ్ సెంటర్ల నిర్వాహకులు తప్పనిసరిగా అన్ని చట్టాలు మరియు నిబంధనలను పాటించాలని విశాఖపట్నం సిటీ పోలీసులు సూచించారు.

వారు తప్పనిసరిగా:

అన్ని లైసెన్సులు మరియు అనుమతులు కలిగి ఉండాలి. ఫైర్ సేఫ్టీ, ఆరోగ్యం మరియు పరిశుభ్రత నిబంధనలు పాటించాలి. శిక్షణ పొందిన సిబ్బందిని మాత్రమే నియమించాలి. కస్టమర్ రికార్డులు మరియు రిజిస్టర్లు సక్రమంగా నిర్వహించాలి. రేటు జాబితా, నియమాలు మరియు అత్యవసర ఫోన్ నంబర్లను అందరికీ కనిపించేలా ప్రదర్శించాలి.

లీజు / యాజమాన్య పత్రాలను సక్రమంగా ఉంచుకోవాలి. స్పా / మసాజ్ సెంటర్లను ఎలాంటి అక్రమ కార్యకలాపాలకు ఉపయోగించకూడదు.

అక్రమ కార్యకలాపాలపై కఠిన చర్యలు :

స్పా / మసాజ్ సెంటర్ల పేరుతో ఎలాంటి అక్రమ కార్యకలాపాలను విశాఖపట్నం సిటీ పోలీసులు అనుమతించరు. నిబంధనలు ఉల్లంఘించినా, వ్యభిచార కార్యకలాపాలకు పాల్పడినా లేదా ఇతర అక్రమ కార్యకలాపాలు నిర్వహించినా, సంబంధిత నిర్వాహకులు మరియు బాధ్యులపై చట్టప్రకారం కఠిన చర్యలు తీసుకుంటారు.

స్పా / మసాజ్ సెంటర్ల నిర్వాహకులు తమ వద్ద ఉన్న లోపాలను వెంటనే సరిచేసుకుని, అన్ని నిబంధనలను తప్పనిసరిగా పాటించాలి. నగరంలో ప్రజల భద్రతను కాపాడేందుకు మరియు అక్రమ కార్యకలాపాలను అరికట్టేందుకు విశాఖపట్నం సిటీ పోలీసులు ఇలాంటి ప్రత్యేక తనిఖీలను ఇకపై కూడా కొనసాగిస్తారు.