Parvathipuram: జియ్యమ్మవలస మండల పరిషత్ కార్యాలయంలో ఆర్థిక అక్రమాలపై కేసు నమోదు

Parvathipuram: జియ్యమ్మవలస మండల పరిషత్ కార్యాలయంలో భారీ మొత్తంలో ప్రజాధనం దుర్వినియోగం జరిగిందన్న ఆరోపణలు స్థానికంగా చర్చనీయాంశంగా మారాయి. సుమారు రూ.9.18 లక్షల నిధులను నిబంధనలకు విరుద్ధంగా ఉపసంహరించి వ్యక్తిగత అవసరాలకు వినియోగించినట్లు మండల పరిషత్ అధ్యక్షుడు బొంగు సురేష్ పోలీసులకు ఫిర్యాదు చేశారు.

ఫిర్యాదు ప్రకారం, కార్యాలయానికి సంబంధించిన పలు అభివృద్ధి కార్యక్రమాల నిధులు, డిపాజిట్ మొత్తాలు మరియు ఇతర ప్రభుత్వ పథకాల నిధులను సంబంధిత అనుమతులు, పరిపాలనా ప్రక్రియలు పాటించకుండా ఖాతాల నుంచి ఉపసంహరించినట్లు ఆరోపణలు ఉన్నాయి. ఈ వ్యవహారంలో ఎంపీడీవోతో పాటు మరికొంతమంది కార్యాలయ సిబ్బంది పాత్ర ఉన్నట్లు ఫిర్యాదులో పేర్కొన్నారు.

మండల పరిషత్ నిధుల లావాదేవీల్లో అవకతవకలు జరిగాయని గుర్తించిన అనంతరం సంబంధిత పత్రాలను పరిశీలించి పోలీసులకు ఫిర్యాదు చేసినట్లు ఎంపీపీ తెలిపారు. ప్రజాధనాన్ని పరిరక్షించాల్సిన అధికారులు నిబంధనలను ఉల్లంఘించి వ్యవహరించారని ఆయన ఆరోపించారు.

ఫిర్యాదును స్వీకరించిన పోలీసులు ప్రాథమిక విచారణ చేపట్టి, ఉన్నతాధికారుల ఆదేశాల మేరకు కేసు నమోదు చేసినట్లు వెల్లడించారు. ఘటనకు సంబంధించిన పూర్తి వివరాలను సేకరించి దర్యాప్తు కొనసాగిస్తున్నామని చినమేరంగి సర్కిల్ ఇన్స్పెక్టర్ టివి. తిరుపతి రావు తెలిపారు.

ఈ వ్యవహారం వెలుగులోకి రావడంతో మండల పరిషత్ కార్యాలయ పనితీరుపై స్థానిక ప్రజలు, ప్రజాప్రతినిధులలో చర్చ సాగుతోంది.