Garividi: రేగటి గ్రామంలో వర్షంలోనూ కిమిడి సంధ్య ప్రచార హోరు!

గరివిడి: చీపురుపల్లి నియోజకవర్గంలోని రేగటి గ్రామంలో ప్రజాప్రతినిధులు, పార్టీ నాయకులు విస్తృతంగా పర్యటించి ఎన్నికల ప్రచారం నిర్వహించారు. వర్షాన్ని సైతం లెక్కచేయకుండా నాయకులు, కార్యకర్తలు జోరుగా పర్యటిస్తూ ఓటర్లను నేరుగా కలిసి మద్దతు ఇవ్వాలని అభ్యర్థించారు.

జెడ్పీటీసీ అభ్యర్థి శ్రీమతి కిమిడి సంధ్య, టీడీపీ రాష్ట్ర కార్యనిర్వాహక కార్యదర్శి శ్రీ కిమిడి రామ మల్లిక్ నాయుడు గారి నాయకత్వంలో ఈ కార్యక్రమం వైభవంగా జరిగింది. గ్రామంలోని ప్రతి ఇంటికీ తిరుగుతూ స్థానిక ప్రజల సమస్యలను అడిగి తెలుసుకోవడమే కాకుండా, రాబోయే రోజుల్లో చేపట్టబోయే అభివృద్ధి పనుల గురించి వివరంగా తెలియజేశారు.

ఈ సందర్భంగా నాయకులు మాట్లాడుతూ.. ముఖ్యమంత్రి నారా చంద్రబాబు నాయుడు, ఉపముఖ్యమంత్రి పవన్ కళ్యాణ్, విద్యా మరియు ఐటీ శాఖల మంత్రి నారా లోకేష్ గారి నేతృత్వంలో రాష్ట్రం అభివృద్ధి పథంలో పయనిస్తోందని కొనియాడారు. కూటమి ప్రభుత్వ హయాంలో అమలవుతున్న సంక్షేమ పథకాలు, యువతకు లభిస్తున్న ఉద్యోగ, ఉపాధి అవకాశాల గురించి ప్రజలకు స్పష్టంగా వివరించారు.

అలాగే స్థానిక శాసనసభ్యులు, మాజీ మంత్రివర్యులు శ్రీ కిమిడి కళావెంకటరావు గారు ప్రాంతీయ అభివృద్ధికి చేసిన కృషిని, ఆయన అందించిన సేవలను ప్రజలకు గుర్తుచేశారు. నియోజకవర్గ సమగ్ర అభివృద్ధికి, ప్రజల సంక్షేమానికి కట్టుబడి ఉన్న సైకిల్ గుర్తుకే ఓటు వేసి తమను భారీ మెజార్టీతో గెలిపించాలని కోరారు. ఈ కార్యక్రమంలో స్థానిక నాయకులు, కార్యకర్తలు, విపరీతమైన సంఖ్యలో గ్రామానికి చెందిన ప్రజలు పాల్గొన్నారు.