Cheepurupalli: చీపురుపల్లిలో పోలీసుల ‘ఆపరేషన్ వజ్రప్రహార్’: గంజాయి నిర్మూలనే లక్ష్యంగా అర్థరాత్రి సోదాలు!

చీపురుపల్లి: గంజాయి, అసాంఘిక కార్యకలాపాల నిర్మూలన లక్ష్యంగా చీపురుపల్లి నియోజకవర్గంలో పోలీసులు శుక్రవారం తెల్లవారుజామున ‘ఆపరేషన్ వజ్రప్రహార్’ చేపట్టారు. రాష్ట్ర డీజీపీ హరీష్ కుమార్ గుప్తా ఆదేశాలు, ఈగల్ చీఫ్ ఐజీ ఆకే రవికృష్ణ పర్యవేక్షణలో జిల్లా ఎస్పీ ఎ.ఆర్. దామోదర్ ఉత్తర్వుల మేరకు చీపురుపల్లి డీఎస్పీ ఎస్. రాఘవులు ఆధ్వర్యంలో ఈ కార్డన్ అండ్ సెర్చ్ నిర్వహించారు.

250 ఇళ్లల్లో తనిఖీలు:

చీపురుపల్లి పోలీస్ స్టేషన్ పరిధిలోని అంబేద్కర్ కాలనీ, రామాంజనేయ కాలనీల్లో సుమారు 50 మంది పోలీసు అధికారులు, సిబ్బంది, ఈగల్ టీం సభ్యులు బృందాలుగా ఏర్పడి ఆకస్మిక సోదాలు చేపట్టారు. మొత్తం 250 ఇళ్లల్లో, బహిరంగ ప్రదేశాల్లో తనిఖీలు నిర్వహించారు. అపరిచిత వ్యక్తుల వివరాలు సేకరించి ఎంఎస్‌సీడీ పరికరాలతో వేలిముద్రలు తనిఖీ చేశారు.

15 బైక్‌లు సీజ్:

వాహనాల రికార్డులు పరిశీలించగా సరైన పత్రాలు లేని 15 ద్విచక్ర వాహనాలను సీజ్ చేసి చీపురుపల్లి పోలీస్ స్టేషన్‌కు తరలించారు. అయితే ఈ సోదాల్లో ఎక్కడా గంజాయి, నాటుసారా, నాటుతుపాకులు లాంటి నిషేధిత వస్తువులు లభ్యం కాలేదని డీఎస్పీ రాఘవులు తెలిపారు.

యాంటీ డ్రగ్స్ ప్రతిజ్ఞ:

సోదాల అనంతరం డీఎస్పీ రాఘవులు, సీఐ శంకరరావు స్థానిక యువత, ప్రజలతో సమావేశమయ్యారు. గంజాయి వల్ల కలిగే దుష్ప్రభావాలను వివరించి యాంటీ డ్రగ్స్ ప్రతిజ్ఞ చేయించారు. చట్ట వ్యతిరేక కార్యకలాపాలకు దూరంగా ఉండాలని, సైబర్ నేరాలు, రోడ్డు భద్రతపై అవగాహన కల్పించారు. గంజాయి సమాచారం ఉంటే 1972 నంబర్‌కు లేదా డయల్ 100/112కు తెలపాలని కోరారు.

డీఎస్పీ హెచ్చరిక:

"ప్రజల రక్షణ, గంజాయి నిర్మూలన కోసం చీపురుపల్లి సబ్ డివిజన్ పరిధిలో ఇలాంటి ఆకస్మిక తనిఖీలు ఇకపై తరచూ నిర్వహిస్తాం. అనుమానితుల కదలికలపై నిత్యం నిఘా ఉంటుంది" అని డీఎస్పీ రాఘవులు హెచ్చరించారు. ఈ ఆపరేషన్‌లో చీపురుపల్లి సీఐ శంకరరావు, ఎస్ఐలు నారాయణరావు, దామోదర్ , లోకేష్ మరియు ఈగల్ టీం సిబ్బంది పాల్గొన్నారు.