Kurupam: కురుపాంలో ముమ్మరంగా సాగుతున్న కూటమి అభ్యర్థుల ఎన్నికల ప్రచారం!

Kurupam: పార్వతీపురం మన్యం జిల్లా కురుపాం నియోజకవర్గంలో కూటమి అభ్యర్థులు ఎన్నికల ప్రచారాన్ని ముమ్మరం చేశారు. ఇందులో భాగంగా శనివారం కురుపాం మండలంలోని మొండెంఖల్లు ఎంపీటీసీ పరిధిలోని మరుపల్లి, నాగర గ్రామాల్లో కూటమి ఎంపీటీసీ అభ్యర్థి గుడారి లక్ష్మీ, పొడి ఎంపీటీసీ పరిధిలోని కూటమి అభ్యర్థి పత్తిక సత్యంతో కలిసి కురుపాం మండల కూటమి జడ్పీటీసీ అభ్యర్థి వైరిచర్ల వీరేష్ చంద్రదేవ్ విస్తృతంగా ప్రచారం నిర్వహించారు.

గ్రామాల్లో పర్యటిస్తూ స్థానిక ప్రజలను, ఓటర్లను కలుసుకుని కూటమి ప్రభుత్వ పాలనలో చేపట్టిన అభివృద్ధి కార్యక్రమాలు, అమలు చేస్తున్న సంక్షేమ పథకాలను వివరించారు. ప్రభుత్వం ద్వారా ప్రజలకు అందుతున్న సంక్షేమ ఫలాలను వివరిస్తూ రానున్న రోజుల్లో మరింత అభివృద్ధి సాధించేందుకు కూటమి అభ్యర్థులకు మద్దతు తెలపాలని కోరారు.

ఈ సందర్భంగా జడ్పీటీసీ అభ్యర్థి వైరిచర్ల వీరేష్ చంద్రదేవ్ మాట్లాడుతూ గ్రామీణ ప్రాంతాల అభివృద్ధి, ప్రజా సంక్షేమమే లక్ష్యంగా కూటమి ప్రభుత్వం పనిచేస్తోందని వివరించారు. స్థానిక సమస్యల పరిష్కారానికి, గ్రామాల అభివృద్ధికి కృషి చేస్తామని ప్రజలకు తెలియజేస్తూ కూటమి అభ్యర్థులను ఆదరించి ఓటు వేసి గెలిపించాలని విజ్ఞప్తి చేశారు.

మొండెంఖల్లు, పొడి ఎంపీటీసీ పరిధిలో సాగిన ఈ ప్రచార కార్యక్రమంలో కూటమి నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు. గ్రామాల్లో అభ్యర్థుల పర్యటనతో ఎన్నికల ప్రచార సందడి నెలకొంది.