Warangal: ఎన్‌ఐటీ వరంగల్ 24వ స్నాతకోత్సవం అట్టహాసంగా ప్రారంభం!

Warangal: నేషనల్ ఇన్‌స్టిట్యూట్ ఆఫ్ టెక్నాలజీ వరంగల్ 24వ స్నాతకోత్సవం రెండు రోజుల కార్యక్రమంగా అంబేద్కర్ లెర్నింగ్ సెంటర్‌లో ఘనంగా ప్రారంభమైంది. స్నాతకోత్సవం తొలిరోజైన సెప్టెంబర్ 19న 930 మంది అండర్‌గ్రాడ్యుయేట్ విద్యార్థులకు, 22 మంది ఎగ్జిట్ డిగ్రీ విద్యార్థులకు పట్టాలను ప్రదానం చేశారు. సెప్టెంబర్ 20న పీజీ, పీహెచ్‌డీ విద్యార్థులకు డిగ్రీలను ప్రదానం చేయనున్నారు.

కార్యక్రమానికి టెక్సాస్ ఇన్‌స్ట్రుమెంట్స్ ఇండియా మేనేజింగ్ డైరెక్టర్ శ్రీ సంతోష్ కుమార్ ముఖ్య అతిథిగా, ఎన్‌ఐటీ వరంగల్ బోర్డ్ ఆఫ్ గవర్నర్స్ చైర్‌పర్సన్ డా. బి.వి.ఆర్. మోహన్ రెడ్డి గౌరవ అతిథిగా, ఎన్‌ఐటీ వరంగల్ డైరెక్టర్ ప్రొఫెసర్ బిద్యాధర్ సుబుది హాజరయ్యారు.

అకడమిక్ ప్రొసెషన్‌తో ప్రారంభమైన స్నాతకోత్సవం

అకడమిక్ ప్రొసెషన్, జాతీయ గీతంతో స్నాతకోత్సవ కార్యక్రమాలు ప్రారంభమయ్యాయి. అనంతరం బోర్డ్ ఆఫ్ గవర్నర్స్ చైర్‌పర్సన్ డా. బి.వి.ఆర్. మోహన్ రెడ్డి 24వ స్నాతకోత్సవాన్ని అధికారికంగా ప్రారంభించారు. ఎన్‌ఐటీ వరంగల్ డైరెక్టర్ ప్రొఫెసర్ బిద్యాధర్ సుబుది స్వాగత ప్రసంగం, స్నాతకోత్సవ నివేదికను సమర్పించారు. అనంతరం చైర్‌పర్సన్, ముఖ్య అతిథి ప్రసంగాలు, గౌరవ డిగ్రీల ప్రదానం, అండర్‌గ్రాడ్యుయేట్ డిగ్రీల ప్రదానం, పతకాలు మరియు అవార్డుల ప్రదానం జరిగాయి.

విద్యార్థులు జ్ఞానంతో పాటు విలువలను కూడా జీవితంలో ఆచరించాలి: ప్రొఫెసర్ బిద్యాధర్ సుబుది స్నాతకోత్సవ నివేదికను సమర్పించిన ఎన్‌ఐటీ వరంగల్ డైరెక్టర్ ప్రొఫెసర్ బిద్యాధర్ సుబుది, స్నాతకోత్సవం విద్యార్థుల జ్ఞానం, పట్టుదల, విజయాలను జరుపుకునే సందర్భమే కాకుండా, వారి జీవితంలో కొత్త అధ్యాయానికి నాంది పలికే ఘట్టమని అన్నారు.

సంస్థలో విద్యా, పరిశోధన, ఆవిష్కరణలు మరియు మౌలిక వసతుల అభివృద్ధికి తీసుకుంటున్న చర్యలను ఆయన వివరించారు. 2026–27 విద్యా సంవత్సరంలో క్వాంటమ్ టెక్నాలజీ, ఆర్టిఫిషియల్ ఇంటెలిజెన్స్, ఎలక్ట్రిక్ వెహికల్స్, మెటీరియల్స్ సైన్స్ అండ్ టెక్నాలజీ వంటి రంగాల్లో కొత్త ఎం.టెక్ కార్యక్రమాలు, ఎలక్ట్రిక్ మొబిలిటీ విభాగంలో బీటెక్, ఇంగ్లిష్ లాంగ్వేజ్ అండ్ లిటరేచర్‌లో ఎం.ఏ. కార్యక్రమాలను ప్రారంభించినట్లు తెలిపారు. బీటెక్ విద్యార్థులకు ఆర్టిఫిషియల్ ఇంటెలిజెన్స్ అండ్ మెషిన్ లెర్నింగ్‌ను తప్పనిసరి చేసినట్లు పేర్కొన్నారు.

పరిశోధన రంగంలో 162 పరిశోధనా ప్రాజెక్టులకు సుమారు రూ.53.63 కోట్ల నిధులు లభించాయని, 2025–26లో 1,771 పరిశోధనా వ్యాసాలు, 617 కాన్ఫరెన్స్ పేపర్లు, 123 బుక్ చాప్టర్లు ప్రచురితమయ్యాయని తెలిపారు. ఈ కాలంలో 36 పేటెంట్లు మంజూరు కాగా, 98 పేటెంట్లు దాఖలయ్యాయని వివరించారు.

సంస్థలో దాదాపు రూ.900 కోట్ల విలువైన మౌలిక వసతుల అభివృద్ధి పనులు కొనసాగుతున్నాయని తెలిపారు. కొత్త హాస్టళ్లు, లెక్చర్ హాల్ కాంప్లెక్సులు, అకడమిక్ బ్లాక్, 2,500 సీట్ల ఓపెన్ యాంఫిథియేటర్, 500 సీట్ల క్యాఫెటీరియా, నార్త్–సౌత్ అండర్‌పాస్ తదితర మౌలిక వసతుల అభివృద్ధి పనులు ఇందులో భాగమని చెప్పారు.

ప్లేస్‌మెంట్లలో అండర్‌గ్రాడ్యుయేట్ విద్యార్థుల్లో 93.94 శాతం, పీజీ విద్యార్థుల్లో 80.78 శాతం మంది ఉద్యోగాలు పొందారని, అండర్‌గ్రాడ్యుయేట్ విద్యార్థులకు సగటు వేతనం రూ.18.54 లక్షలు, అత్యధిక దేశీయ ప్యాకేజీ రూ.1.27 కోట్లు నమోదైందని తెలిపారు.

విద్యార్థులు “Think Boldly, Learn Continuously, Innovate Fearlessly, Lead Ethically, Serve Humanity” అనే ఐదు సూత్రాలను తమ జీవితంలో ఆచరించాలని ప్రొఫెసర్ బిద్యాధర్ సుబుది సూచించారు. “ఈ రోజు NIT వరంగల్ మీకు ఒక డిగ్రీని అందిస్తోంది. రేపు ప్రపంచం దానితో మీరు ఏమి చేస్తారో అడుగుతుంది” అని ఆయన అన్నారు.

“AI యుగంలో ఇంజనీర్ పాత్ర మరింత కీలకం” – డా. బి.వి.ఆర్. మోహన్ రెడ్డి NIT వరంగల్ బోర్డ్ ఆఫ్ గవర్నర్స్ చైర్‌పర్సన్ డా. బి.వి.ఆర్. మోహన్ రెడ్డి “The Role of the Engineer in the AI Era” అనే అంశంపై ప్రసంగించారు. ఆర్టిఫిషియల్ ఇంటెలిజెన్స్ వేగంగా మారుతున్న ప్రపంచంలో ఇంజనీర్ల బాధ్యతలు మరింత విస్తరిస్తున్నాయని అన్నారు.

AIతో కలిసి పనిచేయడం, తమ డొమైన్‌లో ప్రావీణ్యాన్ని కొనసాగించడం, భారతదేశానికి సంబంధించిన వాస్తవ సమస్యలకు పరిష్కారాలు అందించడం, జీవితాంతం నేర్చుకోవడం వంటి అంశాలను ఆయన ప్రస్తావించారు. సాంకేతిక నైపుణ్యాలతో పాటు నమ్మకాన్ని నిర్మించుకోవడం, వైఫల్యాలను స్వీకరించడం, విలువలను కాపాడుకోవడం, సమాజానికి తిరిగి సేవ చేయడం వంటి అంశాలు కూడా విద్యార్థుల భవిష్యత్ ప్రయాణంలో కీలకమని పేర్కొన్నారు.

డిగ్రీలు అందుకున్న ప్రతి విద్యార్థిని డా. బి.వి.ఆర్. మోహన్ రెడ్డి వ్యక్తిగతంగా అభినందించడం కార్యక్రమంలో ప్రత్యేక ఆకర్షణగా నిలిచింది. “వ్యక్తిత్వమే భవిష్యత్తును నిర్ణయిస్తుంది”: సంతోష్ కుమార్ము ఖ్య అతిథి, టెక్సాస్ ఇన్‌స్ట్రుమెంట్స్ ఇండియా మేనేజింగ్ డైరెక్టర్ శ్రీ సంతోష్ కుమార్ విద్యార్థులను ఉద్దేశించి మాట్లాడుతూ, “Character is Fate” అని పేర్కొన్నారు. టెక్నికల్ నైపుణ్యాలు, డిగ్రీలు, రెజ్యూమ్ ఒక వ్యక్తి కెరీర్‌కు అవసరమైన “సాఫ్ట్‌వేర్” అయితే, వ్యక్తిత్వం, నిజాయితీ, విశ్వసనీయత, ఇతరుల పట్ల వ్యవహరించే తీరు వంటి విలువలు “హార్డ్‌వేర్” వంటివని ఆయన వివరించారు.

తమపై ఆధారపడినవారితోనే కాకుండా, తమకు ఎలాంటి ప్రయోజనం కలిగించలేని వ్యక్తులతో ఎలా వ్యవహరిస్తామన్నదే వ్యక్తిత్వానికి ముఖ్యమైన కొలమానమని అన్నారు. వైఫల్యాలకు బాధ్యత తీసుకోవడం, ఒత్తిడిలో పట్టుదలతో ముందుకు సాగడం, నిరంతరం నేర్చుకోవడం వంటి లక్షణాలను విద్యార్థులు అలవరచుకోవాలని సూచించారు.

సెమీకండక్టర్ పరిశ్రమలోని “yield” ఉదాహరణను ప్రస్తావిస్తూ, వైఫల్యాల నుంచి నేర్చుకుని మెరుగుపడటం విజయానికి అవసరమని వివరించారు. పట్టా పొందడం నేర్చుకునే ప్రయాణానికి ముగింపు కాదని, జీవితాంతం కొనసాగాల్సిన అభ్యాసానికి అది ఒక ప్రారంభ దశ మాత్రమేనని అన్నారు.

సాంకేతికతను కేవలం వ్యాపార అవసరాల కోసం కాకుండా సమాజంలోని వాస్తవ సమస్యలను పరిష్కరించేందుకు వినియోగించాలని ఆయన విద్యార్థులకు సూచించారు. మైక్రోగ్రిడ్లు, వ్యవసాయ సెన్సర్లు, సురక్షితమైన తాగునీరు వంటి సమస్యలకు ఆవిష్కరణల ద్వారా పరిష్కారాలు అందించాల్సిన అవసరాన్ని ప్రస్తావించారు.

సిద్ధి బార్పుటేకు డైరెక్టర్ గోల్డ్ మెడల్ అండర్‌గ్రాడ్యుయేట్ విభాగంలో సమగ్రంగా అత్యుత్తమ ప్రతిభ కనబరిచిన సిద్ధి బార్పుటేకు డైరెక్టర్ గోల్డ్ మెడల్ ప్రదానం చేశారు. అదేవిధంగా వివిధ బీటెక్ విభాగాల్లో రోల్ ఆఫ్ ఆనర్ గోల్డ్ మెడల్స్‌ను ప్రదానం చేశారు.

సివిల్ ఇంజినీరింగ్: ప్రియాంశు కుమార్ సింగ్

ఎలక్ట్రికల్ అండ్ ఎలక్ట్రానిక్స్ ఇంజినీరింగ్: నాలజాల జోషిత్

మెకానికల్ ఇంజినీరింగ్: వలుస రఘువరన్ఎ

లక్ట్రానిక్స్ అండ్ కమ్యూనికేషన్ ఇంజినీరింగ్: దొండపాటి లోకేశ్వర్

మెటలర్జికల్ అండ్ మెటీరియల్స్ ఇంజినీరింగ్: మదగాని సాత్విక్

కెమికల్ ఇంజినీరింగ్: సిద్ధి బార్పుటే

కంప్యూటర్ సైన్స్ అండ్ ఇంజినీరింగ్: జయంతి అన్షు

బయోటెక్నాలజీ: అమన్ అబ్దుల్సమద్ ఇనామ్దార్

ఉత్తమ బీటెక్ ప్రాజెక్ట్‌కు అవార్డు

మెకానికల్ ఇంజినీరింగ్‌కు చెందిన మిస్ బుద్ద జేష్వంతి రూపొందించిన “Experimental Investigations on a Compact Dual Cell Passive DMFC and Stack Design for Power Generation” ప్రాజెక్ట్‌కు Best B.Tech Project Award లభించింది. ఈ ప్రాజెక్ట్‌కు ప్రొఫెసర్ జి. నాగ శ్రీనివాసులు మార్గదర్శకత్వం వహించారు.

ఇద్దరు ప్రముఖులకు గౌరవ డిగ్రీలు

స్నాతకోత్సవం సందర్భంగా ఇద్దరు ప్రముఖులకు గౌరవ డిగ్రీలను ప్రదానం చేశారు. ఏవియేషన్, ఏరోస్పేస్ ఇంజినీరింగ్ రంగాల్లో ఆటోమేటిక్ కంట్రోల్ టెక్నాలజీల వినూత్న వినియోగానికి చేసిన విశిష్ట సేవలకు డా. పి.కె. మెనన్కు డాక్టర్ ఆఫ్ సైన్స్ (D.Sc.) గౌరవ డిగ్రీ ప్రదానం చేశారు.

భారతదేశ సెమీకండక్టర్ రంగ అభివృద్ధికి సాంకేతిక నాయకత్వం ద్వారా చేసిన విశిష్ట కృషికి మైక్రాన్ ఇండియా మేనేజింగ్ డైరెక్టర్ శ్రీ ఆనంద్ రామమూర్తికి గౌరవ డాక్టర్ ఆఫ్ ఫిలాసఫీ (Ph.D.) డిగ్రీని ప్రదానం చేశారు. తొలిరోజు కార్యక్రమాలు గోల్డ్ మెడలిస్ట్ ఆధ్వర్యంలో గ్రాడ్యుయాండ్స్ ప్రతిజ్ఞ చేయడంతో ముగిశాయి. అనంతరం జాతీయ గీతాలాపనతో పాటు అకడమిక్ ప్రొసెషన్ నిష్క్రమణతో కార్యక్రమం ముగిసింది.

సెప్టెంబర్ 20న పీజీ, పీహెచ్‌డీ డిగ్రీల ప్రదానం

24వ స్నాతకోత్సవం రెండో రోజైన సెప్టెంబర్ 20న పీజీ, పీహెచ్‌డీ విద్యార్థులకు డిగ్రీలను ప్రదానం చేయనున్నారు. ఈ సందర్భంగా Best Ph.D. Thesis, Best M.Tech Dissertation అవార్డులతో పాటు పీజీ విద్యార్థులకు రోల్ ఆఫ్ ఆనర్ గోల్డ్ మెడల్స్‌ను కూడా ప్రదానం చేయనున్నారు.