Parkal: పరకాల దామెర చెరువు వద్ద కోలాహలంగా సద్దుల బతుకమ్మ

Parkal: పరకాల పట్టణంలోని దామెర చెరువు వద్ద సద్దుల బతుకమ్మ వేడుకలు ఆదివారం కోలాహలంగా జరిగాయి. పట్టణంలోని వివిధ వార్డుల నుంచి మహిళలు పెద్ద సంఖ్యలో రంగురంగుల బతుకమ్మలను పేర్చుకొని చెరువు కట్టకు తరలివచ్చారు. చెరువు కట్ట మొత్తం మహిళల కోలాహలం, బతుకమ్మ పాటలతో సందడిగా మారింది.

ఈ వేడుకలకు 15వ వార్డు కౌన్సిలర్ కుక్కల విజయ్, 12వ వార్డు కౌన్సిలర్ ఆకుల లావణ్య శ్రీధర్ దంపతులు హాజరయ్యారు. వారు మహిళలతో కలిసి బతుకమ్మల చుట్టూ తిరుగుతూ ఆడిపాడారు. అనంతరం సంప్రదాయబద్ధంగా బతుకమ్మలను దామెర చెరువులో నిమజ్జనం చేశారు.

ఈ సందర్భంగా కౌన్సిలర్లు మాట్లాడుతూ... బతుకమ్మ పండుగ తెలంగాణ ఆడబిడ్డల ఆత్మగౌరవానికి, సంస్కృతి సంప్రదాయాలకు ప్రతీక అన్నారు. ప్రకృతిని ఆరాధిస్తూ, మహిళల ఐక్యతను చాటే గొప్ప పండుగ బతుకమ్మ అని, ప్రతి ఒక్కరు ఆనందోత్సాహాలతో జరుపుకోవడం సంతోషంగా ఉందని తెలిపారు. వేడుకలకు భక్తులు పెద్ద సంఖ్యలో హాజరయ్యారు.