Warangal: సీకేఎం ఆసుపత్రిలో ఘనంగా లయన్స్ క్లబ్ అన్నదానం!

వరంగల్‌: వరంగల్‌లోని సీకేఎం (CKM) ఆసుపత్రిలో లయన్స్ క్లబ్ ఆఫ్ వరంగల్ పోతన ఆధ్వర్యంలో అన్నదాన కార్యక్రమాన్ని ఘనంగా నిర్వహించారు. క్లబ్ అధ్యక్షుడు లయన్ సింగారం శ్రీకర్ ఆధ్వర్యంలో జరిగిన ఈ కార్యక్రమానికి ముఖ్య అతిథిగా ఇండియన్ రెడ్ క్రాస్ సొసైటీ వరంగల్ జిల్లా చైర్మన్ లయన్ బేతి అశోక్ బాబు హాజరయ్యారు.

ఈ సందర్భంగా ఆయన మాట్లాడుతూ, ఆసుపత్రికి వచ్చే రోగుల సహాయకులకు, నిరుపేదలకు అన్నదానం చేయడం ఎంతో అభినందనీయమని అన్నారు. ఆకలితో ఉన్నవారికి అన్నం పెట్టడం కంటే గొప్ప సేవ మరొకటి లేదని, సేవా కార్యక్రమాల ద్వారా సమాజంలో మానవత్వం, సేవాభావం పెంపొందుతాయని పేర్కొన్నారు.

ఈ అన్నదాన కార్యక్రమానికి ఆర్థిక సహకారం అందించిన దాత మెంతుల శశిధర్‌కు ప్రత్యేక కృతజ్ఞతలు తెలిపారు. ఈ కార్యక్రమంలో లయన్స్ క్లబ్ సభ్యులు లయన్ ఆడెపు రవీందర్, లయన్ లకుం ఐలయ్య, మునికుంట్ల ఐలేష్ కుమార్ తదితరులు, సీకేఎం ఆసుపత్రి సిబ్బంది పాల్గొన్నారు.