Nidamarru: నిడమర్రులో ‘ఒక నెల – ఒక గ్రామం’ పర్యటన.. పాల్గొన్న కలెక్టర్, ఎమ్మెల్యే

నిడమర్రు: ఆంధ్రప్రదేశ్ రాష్ట్ర ప్రభుత్వం ప్రతిష్టాత్మకంగా అమలు చేస్తున్న “ఒక నెల – ఒక గ్రామం – నాలుగు సందర్శనలు” కార్యక్రమంలో భాగంగా ఉంగుటూరు నియోజకవర్గం నిడమర్రు మండలంలో నాలుగో విడత పర్యటన నిర్వహించారు. ఈ కార్యక్రమంలో ఏలూరు జిల్లా కలెక్టర్ శ్రీమతి కె. వెట్రి సెల్వి గారు, ఉంగుటూరు ఎమ్మెల్యే శ్రీ పత్సమట్ల ధర్మరాజు గారు, జాయింట్ కలెక్టర్ ఎం.జె. అభిషేక్ గౌడ్ గారు, ఆర్డీవో కె. లక్ష్మీ ప్రసన్న గారు పాల్గొన్నారు.

ఈ సందర్భంగా గత మూడు విడతల పర్యటనల్లో ప్రజల నుంచి స్వీకరించిన వినతుల పరిష్కార పురోగతిపై సమగ్ర సమీక్ష నిర్వహించారు. గ్రామాభివృద్ధి, సంక్షేమ కార్యక్రమాలు, తాగునీరు, డ్రైనేజీ, రహదారులు, ఇరిగేషన్, పెన్షన్లు, భూ సమస్యలు మరియు ఇతర రెవెన్యూ అంశాలకు సంబంధించిన అర్జీలపై అధికారులు చేపట్టిన చర్యలను కలెక్టర్ గారు, ఎమ్మెల్యే గారు పరిశీలించారు. పెండింగ్‌లో ఉన్న సమస్యలను నిర్దిష్ట గడువులో పరిష్కరించాలని సంబంధిత అధికారులను ఆదేశించారు.

అదేవిధంగా నాలుగో విడత కార్యక్రమంలో ప్రజల నుంచి మొత్తం 46 వినతులను స్వీకరించారు. ప్రధానంగా రెవెన్యూ స్థలాల సర్వే, భూ సంబంధిత సమస్యలు, పెన్షన్ల మంజూరు, మౌలిక వసతులు మరియు ఇతర ప్రజా సమస్యలకు సంబంధించిన అర్జీలు అందాయి. వినతులను పరిశీలించి సమస్యలను క్షేత్రస్థాయిలో పరిష్కరించేందుకు తక్షణ చర్యలు తీసుకోవాలని అధికారులకు సూచించారు.

ఈ సందర్భంగా ఎమ్మెల్యే శ్రీ పత్సమట్ల ధర్మరాజు గారు మాట్లాడుతూ, “ఒక నెల – ఒక గ్రామం – నాలుగు సందర్శనలు” కార్యక్రమం ద్వారా గ్రామాల్లో ఉన్న సమస్యలను ప్రత్యక్షంగా తెలుసుకొని వాటి పరిష్కారానికి వేగవంతమైన చర్యలు తీసుకునే అవకాశం కలుగుతోందన్నారు. గత మూడు విడతల్లో వచ్చిన వినతుల పరిష్కారంపై నిరంతర పర్యవేక్షణ కొనసాగిస్తూ, నాలుగో విడతలో అందిన అర్జీలను కూడా త్వరితగతిన పరిష్కరించేందుకు చర్యలు తీసుకుంటామని తెలిపారు.

ఈ కార్యక్రమంలో వివిధ శాఖల జిల్లా, మండల స్థాయి అధికారులు, ప్రజాప్రతినిధులు, జనసేన, తెలుగుదేశం పార్టీ, భారతీయ జనతా పార్టీ నాయకులు, కూటమి పార్టీల కార్యకర్తలు మరియు గ్రామ ప్రజలు పెద్ద సంఖ్యలో పాల్గొన్నారు.