Narsapuram: నూతన ప్రజాప్రతినిధులకు ఎమ్మెల్యే బొమ్మిడి నాయకర్ పిలుపు

నరసాపురం: పశ్చిమగోదావరి జిల్లా నరసాపురంలో జనసేన ఎమ్మెల్యే, ప్రభుత్వ విప్ బొమ్మిడి నాయకర్ మీడియా సమావేశం నిర్వహించారు. ఇటీవల జరిగిన ఎన్నికల్లో నూతనంగా ఎన్నికైన జడ్పీటీసీ, ఎంపీటీసీ సభ్యులకు ఈ సందర్భంగా శుభాకాంక్షలు తెలియజేశారు. ప్రజలు తమపై ఉంచిన నమ్మకాన్ని నిలబెట్టుకుంటూ గ్రామాల అభివృద్ధికి అంకితభావంతో పనిచేయాలని దిశానిర్దేశం చేశారు.

గ్రామాల్లో నెలకొన్న సమస్యలను గుర్తించి, వాటిని సంబంధిత ఉన్నతాధికారుల దృష్టికి తీసుకెళ్లి పరిష్కారానికి కృషి చేయాలని సూచించారు. ప్రజలకు ఎల్లప్పుడూ అందుబాటులో ఉంటూ అభివృద్ధి, సంక్షేమ కార్యక్రమాల్లో చురుగ్గా పాల్గొనాలని పిలుపునిచ్చారు.

అలాగే మండల పరిషత్, జిల్లా పరిషత్, మున్సిపాలిటీల్లో ప్రజాప్రతినిధులు, చైర్మన్లకు ప్రజలు మంచి మెజారిటీతో మద్దతు తెలిపారని పేర్కొన్నారు. ప్రజలు కల్పించిన ఈ అవకాశాన్ని బాధ్యతగా తీసుకుని స్థానిక సంస్థల అభివృద్ధికి సమష్టిగా కృషి చేయాలని ఎమ్మెల్యే బొమ్మిడి నాయకర్ సూచించారు.