Penumantra: మార్టేరులో ఘనంగా 1000 మట్టి వినాయకుల ఉచిత పంపిణీ!

పెనుమంట్ర: వినాయక చవితి పర్వదినాన్ని పురస్కరించుకుని పర్యావరణ పరిరక్షణపై ప్రజల్లో అవగాహన కల్పించేందుకు జనసేన పార్టీ ఆధ్వర్యంలో మార్టేరు సెంటర్‌లోని జనసేన పార్టీ స్తూపం వద్ద 1000 మట్టి వినాయక ప్రతిమలను ఉచితంగా పంపిణీ చేశారు. మట్టి వినాయక ప్రతిమలను ప్రతిష్ఠించి భక్తిశ్రద్ధలతో పూజలు నిర్వహించాలని ప్రజలకు పిలుపునిస్తూ ఈ కార్యక్రమాన్ని నిర్వహించారు.

జనసేన పార్టీ నాయకులు అడబాల శ్రీనివాస్, లక్ష్మీ ఫైర్ వర్క్స్, ఆలమూరు వారి ఆర్థిక సహకారంతో మట్టి వినాయక ప్రతిమలను భక్తులకు ఉచితంగా అందజేశారు. కార్యక్రమానికి ఆచంట నియోజకవర్గ శాసనసభ్యులు పితాని సత్యనారాయణ కుమారుడు పితాని వెంకట్ ముఖ్య అతిథిగా హాజరై భక్తులకు మట్టి వినాయక ప్రతిమలను పంపిణీ చేశారు.

ఈ సందర్భంగా జనసేన పార్టీ పెనుమంట్ర మండల అధ్యక్షులు కోయ వెంకట కార్తీక్ మాట్లాడుతూ.. వినాయక చవితి సందర్భంగా పర్యావరణహితమైన మట్టి విగ్రహాలను వినియోగించడం ద్వారా పర్యావరణాన్ని పరిరక్షించవచ్చన్నారు. ప్లాస్టర్ ఆఫ్ పారిస్‌తో తయారుచేసిన వినాయక ప్రతిమలను నిమజ్జనం చేయడం వల్ల నీటి వనరులు కలుషితం కావడంతో పాటు జలచరాలకు, పర్యావరణానికి హాని కలిగే అవకాశం ఉందని తెలిపారు.

జనసేన పార్టీ అధినేత, ఆంధ్రప్రదేశ్ ఉప ముఖ్యమంత్రి కొణిదెల పవన్ కళ్యాణ్ పర్యావరణ పరిరక్షణ ఆశయాలకు అనుగుణంగా ప్రతి ఒక్కరూ మట్టి వినాయక ప్రతిమలను ఉపయోగించాలని ఆయన కోరారు. మట్టి విగ్రహాలు పర్యావరణానికి అనుకూలంగా ఉండటంతో పాటు మన సంప్రదాయాలు, సంస్కృతిని కాపాడేందుకు దోహదపడతాయని పేర్కొన్నారు.

భక్తిశ్రద్ధలతో వినాయకుడిని పూజించడంతో పాటు నిమజ్జనం విషయంలోనూ ప్రతి ఒక్కరూ బాధ్యతాయుతంగా వ్యవహరించాలని కోరారు. పర్యావరణాన్ని కాపాడటం ప్రతి ఒక్కరి బాధ్యత అని అన్నారు.

ఈ కార్యక్రమంలో జనసేన పార్టీ పెనుమంట్ర మండల నాయకులు, మండల కమిటీ సభ్యులు, పంచగ్రామ గ్రామ నాయకులు మిరియాల శ్రీనివాస్, గ్రంథి నాగ రాంప్రసాద్, పట్నాల రవి, సాక శివకుమార్, పమ్మి సుధాకర్ శ్రీను, రాజేష్ సుందరరావు తదితరులతో పాటు జనసైనికులు, కూటమి నాయకులు, అభిమానులు, స్థానిక ప్రజలు పెద్ద సంఖ్యలో పాల్గొన్నారు. “మట్టి వినాయకుడిని ప్రతిష్ఠిద్దాం.. పర్యావరణాన్ని పరిరక్షిద్దాం” అనే సందేశంతో నిర్వహించిన ఈ కార్యక్రమం ప్రజల నుంచి విశేష స్పందనను అందుకుంది.