Veeravasaram: అండలూరు జడ్పీ హైస్కూల్ పక్కనే మురుగు కుంట!

​వీరవాసరం: పశ్చిమ గోదావరి జిల్లా వీరవాసరం మండలం అండలూరు గ్రామంలో పారిశుధ్య లోపం తీవ్రరూపం దాల్చింది. గ్రామంలోని జిల్లా పరిషత్ ఉన్నత పాఠశాలను ఆనుకుని భారీగా మురుగు నీరు నిలిచిపోయినా అధికారులు పట్టించుకోకపోవడంపై స్థానికులు, విద్యార్థుల తల్లిదండ్రులు తీవ్ర ఆగ్రహం వ్యక్తం చేస్తున్నారు.

​పాఠశాల పక్కనే మురుగు నీరు కుంటలా మారి దుర్గంధం వెదజల్లుతోంది. దీనివల్ల దోమలు వ్యాపించి పాఠశాలలో చదివే విద్యార్థులు, తీవ్ర ఇబ్బందులు ఎదుర్కొంటున్నారు. డెంగ్యూ, మలేరియా వంటి తీవ్రమైన వ్యాధులు ప్రబలే ప్రమాదం ఉందని పరిసర ప్రాంతాల ప్రజలు ఆందోళన చెందుతున్నారు.

​అధికారులకు పలుమార్లు విన్నవించినా ఎటువంటి చర్యలు తీసుకోలేదని గ్రామస్థులు ఆవేదన వ్యక్తం చేస్తున్నారు. ఇప్పటికైనా సంబంధిత అధికారులు తక్షణమే స్పందించి మురుగు నీటిని తొలగించి, పారిశుధ్య చర్యలు చేపట్టాలని గ్రామ ప్రజలు, విద్యార్థుల తల్లిదండ్రులు డిమాండ్ చేస్తున్నారు.