భద్రాద్రి కొత్తగూడెం ఎస్పీ రోహిత్ రాజు ఐపీఎస్ పర్యవేక్షణలో సైబర్ క్రైమ్ పోలీసులు వేగంగా స్పందించి అశ్వాపురం హెవీ వాటర్ ప్లాంట్ ఉద్యోగి సుశీల్ కుమార్ క్రెడిట్ కార్డు మోసంలో కోల్పోయిన రూ.4,97,526 నగదును సురక్షితం చేశారు. రూ.1.62 లక్షలు రిఫండ్ కాగా, రూ.3.35 లక్షలు హోల్డ్ చేయించారు.

ప్రజాస్వామ్యంలో ఓటు హక్కు ప్రాధాన్యతను ప్రతి విద్యార్థి తెలుసుకొని, యుక్త వయసు రాగానే ఓటరు జాబితాలో పేరు నమోదు చేసుకోవాలని భద్రాచలం సబ్ కలెక్టర్ మృనాల్ శ్రేష్ట శుక్రవారం సూచించారు. ఎన్నికల అక్షరాస్యత క్లబ్ ఆధ్వర్యంలో నిర్వహించిన వ్యాసరచన, క్విజ్ పోటీల విజేతలకు ఆయన బహుమతులు అందజేశారు.

గజ్వేల్‌కు చెందిన దివంగత మాగపు వెంకటలక్ష్మి (2026 ఆగస్టు 30న మృతి) జీవిత బీమా పాలసీకి సంబంధించి రూ.14,80,055 డెత్ క్లెయిమ్‌ను టాటా ఏఐఏ లైఫ్ ఇన్సూరెన్స్ సంస్థ కేవలం 20 రోజుల్లోనే సెటిల్ చేసి నామినీ సత్యనారాయణకు అందించింది. బ్రాంచ్ మేనేజర్ ఆదర్శ్ కుమార్, గుడెల్లి రాజు తదితరులు పాల్గొన్నారు.

పెద్దపల్లి జిల్లా కాల్వ శ్రీరాంపూర్ మండలం జాఫర్‌ఖాన్‌పేట శ్రీ నాగదేవత ఆలయంలో శుక్రవారం నాగుల చవితి ఉత్సవాలు వైభవంగా జరిగాయి. నిర్వాహకులు సంగ కొమురయ్య, గట్టయ్య ఆధ్వర్యంలో పంచామృత అభిషేకాలు, నవగ్రహ హోమాలు, అన్నదానం నిర్వహించారు. సర్పంచ్ జోత్స్న శ్రీనివాస్, మాజీ జడ్పీటీసీ తిరుపతి రెడ్డి పాల్గొన్నారు.

హైదరాబాద్ పోలీస్ కమిషనర్ వీసీ సజ్జనార్‌ను 14 నెలలకే ఆకస్మికంగా బదిలీ చేయడం సరికాదని, వెంటనే ఆపివేయాలని గ్రేటర్ వరంగల్ కాంగ్రెస్ వర్కింగ్ ప్రెసిడెంట్ రాజనాల శ్రీహరి శుక్రవారం డిమాండ్ చేశారు. వరంగల్ ఎస్పీగా, ఆర్టీసీ ఎండీగా, సీపీగా సజ్జనార్ అందించిన సేవలను ఆయన గుర్తుచేశారు.

ఫిలింనగర్‌లోని 6 ఎకరాల శ్రీ పర్వతాంజనేయ స్వామి ఆలయంలో రోడ్డు, తాగునీరు, స్నానపు గదులు, గోవులకు షెడ్డు వంటి కనీస వసతులు లేవని భాగ్యనగర్ ఉత్సవ సమితి కార్యదర్శి పల్లపు గోవర్ధన్ శుక్రవారం విమర్శించారు. అయ్యప్ప స్వాములకు 50 రోజుల భిక్ష ప్రారంభించిన ఆయన, సమస్యల పరిష్కారానికి ఉద్యమిస్తామన్నారు.

పెద్దపల్లి అభివృద్ధి శిలాఫలకాలకే పరిమితమైందని, బైపాస్ రోడ్డు, రైల్వే ఓవర్ బ్రిడ్జి ఎప్పుడు పూర్తి చేస్తారో ఎమ్మెల్యే సమాధానం చెప్పాలని బీజేపీ జిల్లా ప్రధాన కార్యదర్శి పల్లె సదానందం శుక్రవారం ప్రెస్ క్లబ్‌లో డిమాండ్ చేశారు. చారిత్రక కమాన్ చౌరస్తాను మార్చొద్దని, లేదంటే ఆందోళనలు చేస్తామని హెచ్చరించారు.

హనుమకొండలోని రెడ్డి కాలనీ, రాయపుర, ఇందిరా నగర్ ప్రాంతాల్లో TGMC బృందం గురువారం సాయంత్రం ఆకస్మిక తనిఖీలు నిర్వహించింది. బయట అర్హత కలిగిన డాక్టర్ల బోర్డులు పెట్టి లోపల ఇంటర్ పాస్ కాని కాంపౌండర్, ఫార్మసీ వ్యక్తులు వైద్యం చేస్తున్న దందా బయటపడింది. నకిలీ వైద్యులపై 91543 82727కు ఫిర్యాదు చేయాలని కోరారు.

కురవి మండలం కందికొండ శ్రీలక్ష్మీనరసింహస్వామి దేవస్థాన అభివృద్ధిపై విమర్శలు చేస్తున్న మాజీ మంత్రి సత్యవతి రాథోడ్‌కు శుక్రవారం కురవి కాంగ్రెస్ నాయకులు బహిరంగ సవాల్ విసిరారు. ప్రభుత్వ విప్ డాక్టర్ రామచంద్రనాయక్ అభివృద్ధిపై వేదిక, తేదీ మీరే నిర్ణయిస్తే ప్రజల సమక్షంలో ఆధారాలతో చర్చకు సిద్ధమన్నారు.

మంచిర్యాల జిల్లా దండేపల్లి మండలం కంచరబాయి అటవీ ప్రాంతంలో వేటగాళ్లు అమర్చిన విద్యుత్ ఉచ్చులో చిక్కుకుని నవంబర్ 10న బోయిడి రెడ్డి మృతి చెందాడు. రెండు ప్రత్యేక బృందాలతో గాలించిన పోలీసులు పాత మామిడిపల్లి శివారులో 11 మంది నిందితులను అరెస్టు చేసినట్లు ఏసీపీ ఆర్. ప్రకాష్ శుక్రవారం తెలిపారు.

ములుగు జిల్లాలో రేషన్ కార్డు ఉండి, 5 ఎకరాలలోపు భూమి ఉన్న అర్హత కలిగిన ప్రతి కుటుంబానికి దరఖాస్తు చేసుకున్న రెండు రోజుల్లోనే నూతన జాబ్ కార్డు మంజూరు చేస్తామని కలెక్టర్ బోర్ఖడే హేమంత్ సహదేవరావు శుక్రవారం తెలిపారు. ఎల్‌నినో నేపథ్యంలో వీబీ–గ్రామ్ జీ కింద 19 లక్షల పనిదినాలు కల్పిస్తామన్నారు.

నిరుపేద కుటుంబాలకు స్థిరమైన జీవనోపాధి కల్పించాలని, ములుగు జిల్లాలో మిర్చి, ఇప్పపువ్వు ప్రాసెసింగ్ యూనిట్లు ఏర్పాటు చేయాలని పంచాయతీరాజ్ కమిషనర్ దివ్య దేవరాజన్ శుక్రవారం సమీక్షలో ఆదేశించారు. నవంబర్ 19న చీరల పంపిణీకి పకడ్బందీ ఏర్పాట్లు చేయాలన్నారు. కలెక్టర్ బోర్ఖడే, పీఓ లెనిన్ పాల్గొన్నారు.